പ്രഖ്യാപനം മുതൽ മലയാള സിനിമ പ്രേമികളുടെ ശ്രദ്ധ ആകർഷിച്ച ചിത്രം ആയിരുന്നു മൈക്ക്. ബോളിവുഡ് താരം ജോൺ എബ്രഹാം നിർമിക്കുന്നുവെന്ന പ്രേത്യേകത കൊണ്ടാണ് സിനിമ പ്രേമികളുടെ ഇടയിൽ ചിത്രം ശ്രദ്ധ നേടിയത്. അനശ്വര രാജനെ കേന്ദ്ര കഥാപാത്രമാക്കി ഒരുക്കിയ ചിത്രം കഴിഞ്ഞ ദിവസം തീയറ്ററിൽ എത്തിയിരുന്നു. വിഷ്ണു ശിവപ്രസാദ് ഒരുക്കിയ ചിത്രം മികച്ച പ്രതികരണമാണ് നേടി കൊണ്ടിരിക്കുന്നത്.
ചിത്രം മികച്ച പ്രതികരണം നേടുമ്പോൾ ശ്രദ്ധ ആകർഷിക്കുന്നത് ചിത്രത്തിൽ നായകനായി എത്തിയ രഞ്ജിത്ത് സജീവ് ആണ്. പുതുമുഖത്തിന്റെ യാതൊരു പതർച്ചയുമില്ലാതെയാണ് ആന്റണി എന്ന കഥാപാത്രത്തെ രഞ്ജിത്ത് അവതരിപ്പിച്ചത്. പ്രണയ നഷ്ടവും വിരഹവും നിരാശയും സംഘട്ടനവും ചടുലമായ നൃത്തച്ചുവടുകളുമെല്ലാം ഉൾപ്പെട്ട ആന്റണി എന്ന കഥാപാത്രം രഞ്ജിത്തിന്റെ കൈയിൽ ഭദ്രമായിരുന്നു എന്നാണ് സിനിമ കണ്ട പ്രേക്ഷകർ അഭിപ്രായപ്പെടുന്നത്.
സ്ത്രീ കേന്ദ്രീകൃത കഥപറഞ്ഞ ചിത്രത്തിൽ നായികയോളം തന്നെ പ്രാധാന്യമുള്ള കഥാപാത്രമായിരുന്നു രഞ്ജിത്തിന്റേത്. ഭൂതകാലം ഏല്പ്പിച്ച ആഘാതങ്ങളാൽ പഴയ സൗഹൃദങ്ങൽ ഉപേക്ഷിച്ച് മദ്യത്തിൽ അഭയം തേടുന്ന സാഹചര്യങ്ങളിലൂടെ നായക കഥാപാത്രം കടന്നുപോകുന്നുണ്ട്. ഈ രംഗങ്ങൽ രഞ്ജിത്ത് കൈയടക്കത്തോടെയാണ് അവതരിപ്പിച്ചിരിക്കുന്നത്.
വൈകാരിക രംഗങ്ങൾ മനോഹരമായിട്ടാണ് താരം അഭിനയിച്ചിരിക്കുന്നത്. കാണുന്ന പ്രേക്ഷകരുടെ കണ്ണ് നനയിക്കാൻ രഞ്ജിത്തിന് ആയിട്ടുണ്ട്. സംഘട്ടന രംഗങ്ങളിൽ മികച്ച ടൈമിംഗാണ് താരം കാഴ്ചവച്ചത്. പുതുമുഖം ആണോ എന്ന് തോന്നിപ്പിക്കുന്ന തരത്തിലായിരുന്നു താരത്തിന്റെ പ്രകടനം.
ചടുല നൃത്ത ചുവടുകൾ കൊണ്ടും താരം പ്രേക്ഷകരുടെ ഇഷ്ടം പിടിച്ചു പറ്റുന്നു.ഒരു തുടക്കക്കാരൻ എന്ന നിലയിൽ രഞ്ജിത്തിനെ തേടിയെത്തിയ മികച്ച കഥാപാത്രമാണ് മൈക്കിലെ ആന്റണി.ഭാവിയിൽ മികച്ച കഥാപാത്രങ്ങൽ ഈ നടനെ തേടിയെത്തിയേക്കാം.
